ياليت قلبي يـوم صديـت خـلاك
وياليت لو انـه سمـع ماعصانـي
يومي أقول ارفق حبيبـك تناسـاك
ويقـول ماظنـي حبيبـي نسانـي
يقول أنا احبك وماظنـي اجفـاك
تبقى حبيبي لـو يطـول الزمانـي
واليـوم ياقلبـي حبيبـك تحـداك
رحل واخذ معـاه حلـو الأمانـي
وينه يقول اللي تبـي جـد يفـداك
يفدا مواطي رِجْل شخصٍ سبانـي
هذا الكلام اللـي يقولـه الياجـاك
وأنا أدري انه هرجـةٍ باللسانـي
ودي أنا أعرف ياقليبي وش أعطاك
يومك تحبـه لَيْـن حـد الجنانـي
ياما نصحتك قلت هـذا أخـو ذاك
والله مايستاهـل انــك تعـانـي
والحين يـوم الهـم كلـه تغشـاك
تجي تشَكَّى جور صافي الثمانـي
تتذكر أيامن مضت كنـت ويـاك
وشلون حالك كيف راضي وهاني
من قبل مافي حبـه اللـي تبـلاك
ومن قبل ماتنساق خلف الغوانـي
واليوم همك بايـنٍ فـي محيـاك
شف حالتك أصبحت ياكود فانـي
المشكلـه ياقلبـي بكـل ماجـاك
أحس به واليوم أشوفـه وطانـي
جرحي ترى جرحين ماظن يخفاك
ومـا أقـول الا يالله المستعانـي
لكن أبطلب ياقليبـي وانـا افـداك
تكفى أبي ماتعشـق اليـوم ثانـي